એક ફેસબુક પેજ પરથી લોકોને ડિપ્રેશનમાંથી બહાર નીકળવામાં મદદ કરે છે ધારા પટેલ

ધારા પટેલ અને શિવમ પટેલ

ડિપ્રેશન અને સ્ટ્રેસ આ એવી બીમારી છે, જે આજકાલ મોટા ભાગના લોકોને હોય છે. ફરક એટલો પડે કે સ્ટ્રેસને લોકો સ્વીકારી લે છે અને ડિપ્રેશનને સ્વીકારતા નથી. કારણ કે ડિપ્રેશનને માનસિક બીમારી ગણવામાં આવે છે. વર્ચ્યુઅલ વર્લ્ડ જેટલું વિશાળ થયું છે, એટલું જ રિયલ વર્લ્ડ સંકોચાઈ રહ્યું છે. પરિણામે લોકોના સંપર્ક છૂટી રહ્યા છે. કેટલીકવાર એવું પણ બને છે કે સોશિયલ મીડિયા પર લોકોને સંખ્યાબંધ લાઈક્સ મળતી હોય, કમેન્ટસ મળતી હોય પરંતુ તે જ વ્યક્તિ રિયલમાં એકલું ફીલ કરતો હોય, પોતાની વાત લોકોને કહી ન શક્તો હોય. આજકાલના હેક્ટિક શેડ્યુલને કારણે પણ આવી ઘટનાઓ બને છે. પરિણામે લોકો ડિપ્રેશનનો ભોગ બનતા જાય છે.

ત્યારે આવા ડિપ્રેશન સામે લડવા, લોકોને ડિપ્રેશનમાંથી બહાર કાઢવાનું ઈનિશિયેટિવ લીધું છે અમદાવાદના ધારા પટેલે. ધારા પટેલે એક ફેસબુક પેજ પરથી પોતાના ઈનિશેટિવની શરૂઆત કરી હતી. ધારાએ ફેસબુક પર Human is near you, you are not alone નામનું પેજ શરૂ કર્યું છે. જેનાથી તે ડિપ્રેસ લોકોને પોતાની વાત કહેવાનું, શૅર કરવાનું પ્લેટફોર્મ આપે છે. આ વિશે વાત કરતા ધારાનું કહેવું છે કે,'આજકાલ આપણી લાઈફમાં કમ્યુનિકેશન ખૂટે છે. કોઈની સાથે આપણે વાત શૅર કરતા નથી. ત્યારે આ પ્લેટફોર્મ તમને પોતાની વાત કહેવાની તક આપે છે.'


આ છે ધારા પટેલે બનાવેલું પેજ

ધારા પોતે જર્નલિસ્ટ છે, અને હાલ પીઆર તરીકે એક ફર્મમાં કામ કરે છે. અને પોતાના આ બિઝી શેડ્યુલમાંથી સમય કાઢીને તે આ ઈનિશિયેટીવ ચલાવે છે. આ પેજ શરૂ કરવાનો વિચાર કેમ આવ્યો એ સવાલના જવાબમાં ધારાનું કહેવું છે કે,'હું પત્રકાર છું, એટલે ઘણા લોકોને મારે નોકરી દરમિયાન મળવાનું થતું. હાઈપ્રોફાઈલ લોકોને મળતી. સામાન્ય લોકોને મળતી ત્યારે જ લાગતું કે લોકો ડાઉન ફીલ કરે છે. એટલે મને લાગ્યું કે કંઈક કરવું જોઈએ. વધુ તો કંઈ વિચાર્યું નહીં, પણ ફેસબુકનો ઉપયોગ કરીને આ પેજ બનાવ્યું. અને તમે માનશો નહીં પેજ શરૂ થયાના એક જ કલાકમાં મને 200 લોકોના મેસેજ આવ્યા કે આવું પ્લેટફોર્મ જરૂરી છે.'

આજે તો ધારાના આ પેજને 1 વર્ષ જેટલો સમય થઈ ચૂક્યો છે. અને તેમની ટીમમાં બીજા 5 લોકો જોડાઈ ચૂક્યા છે. ધારાની સાથે હવે શિવમ પટેલ પણ આ પેજ હેન્ડલ કરે છે. શિવમ પટેલ આ પેજનું કન્ટેન્ટ અને કમ્યુનિકેશન હેન્ડલ કરે છે. તો તમે ડિપ્રેસ્ડ લોકોને મળો કેવી રીતે અને તેમનું કાઉન્સેલિંગ કેવી રીતે કરો ? આ સવાલના જવાબમાં ધારા કહે છે,'એવા કોઈ ખાસ કાઉન્સેલિંગની જરૂર નથી હોતી. અમે બસ મળવાનું ગોઠવીએ. કોઈ જાહેર જગ્યાએ મળીએ. જેટલા લોકોને રસ હોય એ આવે. ગેમ રમીએ. બધા મળે એકબીજાને વાતો કરે. ફ્રેન્ડશિપ થાય. પોતાના પ્રોબ્લેમ શૅર કરે અને બસ કમ્યુનિકેશન થાય એનાથી જ કામ થઈ જાય છે.'
અત્યાર સુધીમાં આ પેજ થકી ધારા કુલ આઠ મીટ અપ કરી ચૂક્યા છે. જેમાં દર વખતે 30થી 35 લોકો આવે છે. ધારાનું કહેવું છે કે એવા ઘણા લોકો છે જે આ મીટ અપ પછી સારું ફીલ કરે છે. અને હવે અમારી સાથે કામ કરે છે. એક ડિપ્રેસ્ડ લેડી હતા, જેણે ત્રણ મીટ અપ પછી ડિપ્રેશનની દવાઓ લેવાની ઓછી કરી નાખી હતી. તેમને આ મીટ અપથી ફ્રેન્ડ્ઝ મળ્યા, જેમની સાથે તેમણે પ્રોબ્લેમ શૅર કર્યો અને હવે એ લોકો સાથે શોપિંગ કરવા જાય છે, મૂવી જોવા જાય છે. હવે એ ખુશ છે. બસ એક મીટ અપથી જ આટલું કામ થઈ જાય છે.

ધારાના આ પેજની ખ્યાતિ દેશ વિદેશ સુધી પહોંચી છે. ધારા કહે છે કે એક વખત એક છોકરાએ કેનેડાથી અમને ફોન કરીને વાત કરી હતી. તેનું બ્રેક અપ થયું હતું, અને તેને વાત શૅર કરવી હતી. અમે તેને સાંભળ્યો. બસ આજે એ છોકરો પોતે એક સારી પોઝિશન પર છે. તો દુબઈ ગુજરાતી સમાજ પણ આ ઈનિશિયેટિવ વિશે ઈન્કવાયરી કરી ચૂક્યુ છે. ગુજરાતી મિડ ડે ડોટકોમે આ જ મીટ અપથી જેને ફાયદો થયો એવા વ્યક્તિઓ સાથે પણ વાત કરી, જો કે તેઓ પોતાનું નામ જાહેર કરવા નથી ઈચ્છતા, એટલે અમે તેમના મીટ અપનો ફોટો પણ પબ્લિશ નથી કરી રહ્યા (કદાચ આ જ કારણ છે કે લોકો ડિપ્રેશનને જાહેરમાં નથી સ્વીકારી રહ્યા અને વધુને વધુ ભોગ બની રહ્યા છે.) આવા જ એક વ્યક્તિનું કહેવું છે,'આ પ્લેટફોર્મ પર હું એવા વ્યક્તિઓને મળી, જેમના જીવનમાં મારા કરતા વધુ મુશ્કેલી હતી, એમને જોઈને મને પ્રેરણા મળી. મને મિત્રો મળ્યા, મને લાગ્યુ કે હું જે ભોગવું છું એ તો ઓછું છે. હાલ હું એક સફળ આંત્રપ્રેન્યોર છું, પણ જો સાચા સમયે આ પ્લેટફોર્મ મને ન મળ્યું હોત તો કદાચ હું આજે એક દુખી સ્ત્રી તરીકે જીવતી હોત.'

ધારા પોતાની પ્રોફેશનલ લાઈફની સાથે સાથે આ પેજ અને એની એક્ટિવિટી મેનેજ કરે છે. ધારા કહે છે કે મોટા ભાગે અમે રવિવારે જ મળવાનું ગોઠવીએ, એટલે બધા લોકો આવી શકે. રવિવારે અમે બધા મળીએ ને વાતો કરીએ, એકબીજાની વાતો સાંભળીએ. અને આ રીતે આગળ ચાલે રાખે છે.

ઉલ્લેખનીય છે કે ઘણા લોકો ડિપ્રેશનથી પીડાતા હોય છે, ત્યારે આવા પ્લેટફોર્મની સમાજને જરૂર છે. એટલું જ નહીં લોકોએ પણ ખુલીને આ વિશે વાત કરવાની જરૂર છે. ધારા પટેલના આ ઈનિશિયેટિવને કારણે આજે કદાચ સેંકડો લોકો નોર્મલ જીંદગી જીવી રહ્યા છે.

Dhunki Movie Review:એક સપનું પુરુ કરવાની સ્ટ્રગલ એટલે 'ધૂનકી'

ધુનકી

કાસ્ટઃ પ્રતીક ગાંધી, દીક્ષા જોશી, વિશાલ શાહ, કૌશાંબી ભટ્ટ
ડિરેક્ટરઃ અનિશ શાહ

સ્ટોરી કહેતી હૈ.....

જરા વિચારો કે જો સવારે તમારા વાઈફ ઓફિસ જાય છે, અને ટિફિન તમે તૈયાર કરીને આપો !! ઉંધું છે ને, મેલ ઈગોને ન ગમે ને ! પણ છે નોર્મલ, બસ આપણે કરતા નથી. તો જે નથી કરતા એ કરવાની વાત અને એમાં આવતી મુશ્કેલીઓની વાર્તા એટલે અનીશ શાહની ધૂનકી. ફિલ્મની વાર્તા તમને કહી દઈશ તો તમને જોવાની મજા નહીં આવે. પણ ઈશારા ઈશારામાં વાત કરીએ તો આ બે કપલની નહીં પણ ચાર લોકોની વાત છે, ચાર જુદા જુદા વ્યક્તિઓની જર્ની છે. નિકુંજ (પ્રતીક ગાંધી)ને રસોઈ બનાવવી ગમે છે, અને 9 ટુ 5ની જોબથી કંટાળીને એ પેશનને ફોલો કરે છે. તેની ખાસ મિત્ર શ્રેયા (દીક્ષા જોશી)ને પણ રૂટિનથી હટીને કંઈક કરવું છે. એટલે બંને એક સ્ટાર્ટ અપમાં જોડાય છે. જો કે ફિલ્મ સ્ટાર્ટઅપની જર્ની નથી. એક ગમતું કામ કરવામાં આવતી અડચણો, બિઝનેસની મુશ્કેલીઓ અને પર્સનલ લાઈફના ક્લેશની વાર્તા છે. જેને દરેક વ્યક્તિ પોતાની સાથે કનેક્ટ કરી શકે છે. એટલે ફિલ્મનો પ્લસ પોઈન્ટ તેની સ્ટોરી તો છે જ.

એક્ટિંગમાં અવ્વલ

સાથે જ પ્રતીક ગાંધી એઝ ઓલવેઝ એક્સપ્રેશનના બાદશાહ છે. કોમિક સીન હોય કે ઈમોશનલ, પ્રતીકનો ફેસ જોઈને જ દર્શકો કનેક્ટ કરી લે. એમાંય સેલફીશ વાળો સીન તો ગજ્જબ (ના, ના હવે સ્પોઈલર નથી !) તો દીક્ષા જોશીને ફિલ્મની શરૂઆતથી જોવાની મજા આવશે. વિશાલ શાહે પોતાનું પાત્ર એવું પકડ્યું છે કે જો કદાચ તમે તેમને રિયલમાં મળો તો તમે તેમની સ્ક્રીન ઈમ્પેક્ટ લઈને જ મળશો. અને કૌશામ્બી ભટ્ટ બ્યુટીની સાથે બ્રિલિયન્ટ એક્ટિંગ.

આ તો જોવું જ પડે

સાથે એક વાત ખાસ જે ગમી એ છે ફિલ્મનું ડિટેઈલિંગ. તમે ધ્યાન આપશો તો AP નંબરની કાર જોઈને સવાલ થશે ! જવાબ તમને ફિલ્મમાં જ મળશે. આ ઉપરાંત કેટલીક મોમેન્ટ્સ પર આવતી ધૂનકીની બેકગ્રાઉન્ડ ધૂન પણ અમેઝિંગ છે. તો પછી ખરાબ શું છે ?



લાગે છે અહીં ચૂકી ગયા

ફિલ્મમાં ચોટદાર વન લાઈનર્સની કમી વર્તાય. જેમ કે દાળમાંથી મીઠુ કેમ કાઢવું, એવા 4-5 કોમિક સીન વધારે હોત તો હજી મજા આવત. વળી, ફર્સ્ટ હાફ સ્લો છે. તમારે વેઈટ કરવી પડે એક કલાક સુધી કે આગળ ફિલ્મ કેમ જોવી ? કારણ કે જર્નીના ટર્ન આવતા જ સુધીની સ્ક્રીપ્ટ ખેંચાઈ છે. અને ઈન્ટરવલ પણ કોઈ ટ્વિસ્ટ વગર આવી જાય છે. માંડ ફિલ્મ શરૂ થાય, ત્યાં જ ઈન્ટરવલ આવે.

જો કે ફિલ્મની આ 3-4 નેગેટિવ બાબતો સારી સ્ક્રીપ્ટ અને મસ્ત એક્ટિંગ સામે માફ કરી શકાય. પણ એઝ અ વ્યુઅર બધાને પસંદ આવે એવી શક્યતા ઓછી છે. કારણ કે ટિપિકલ કોમેડી સ્ટાઈલ ગુજરાતી ફિલ્મ નથી. વીક એન્ડમાં ફેમિલી સાથે જોશો તો મજા આવશે. કદાચ તમારા પોતાના સપના માટે પ્રેરણા પણ મળી જાય.


એટલે તમામ સારા અને ખરાબ પાસાને ધ્યાનમાં રાખતા મિડ ડે મીટર પર 'ધૂનકી'ને મળે છે 5માંથી 3 સ્ટાર

મિડ ડે મીટર: 5માંથી 3 સ્ટાર

તા.ક. યાર, તમે ક્યારેય ઈંટવાળી દાળ ખાધી છે !!!!

47 ધનસુખ ભવન: ટિપિકલ કોમેડીથી હટીને કંઈક રસપ્રદ આપવાનો પ્રયાસ

47 ધનસુખ ભવન

સ્ટારકાસ્ટઃ ગૌરવ પાસવાલા, ઋષિ વ્યાસ, શ્યામ નાયર
ડિરેક્ટરઃ નૈતિક રાવલ
અર્બન ગુજરાતી ફિલ્મોનો દોર શરૂ થયો ત્યારથી તેમાં બે વાતો કોમન રહી છે. મોટા ભાગે કાં તો તેમાં મિત્રોનું ગ્રૂપ હોય, જેમની વચ્ચે થતી મસ્તીથી ક્યારેક પરાણે હસાવતી કોમેડી અને બીજો દારૂ પીવાનો સીન. મોટા ભાગની અર્બન ગુજરાતી ફિલ્મો આની આસપાસ આવી. જો કે રોંગ સાઈડ રાજુ, કેરી ઓન કેસર, નટસમ્રાટ જેવી અલગ સ્ટોરી લાઈન ધરાવતી ફિલ્મો પણ બની. જો કે ગુજરાતી ફિલ્મ ઈન્ડસ્ટ્રીમાં નવા પ્રયાસો ખૂબ ઓછા થઈ રહ્યા છે. એના કારણોની ચર્ચામાં નથી પડવું. પણ વાત કરીએ પહેલી ગુજરાતી વન શોટ ફિલ્મ 47 ધનસુખ ભવનની.

ટીમે ઝીલ્યો છે પડકાર

સૌથી પહેલા તો આ ફિલ્મની સમીક્ષા કરવાને બદલે ડિરેક્ટર નૈતિક રાવલ, ગેલોપ્સ ટોકીઝ અને ફિલ્મના ત્રણેય લીડ એક્ટરને એટલા માટે બિરદાવવા જોઈએ કારણ કે ગુજરાતી ફિલ્મોને પૂરતા દર્શકો ન મળતા હોવાની જાણ છતાંય તેમણે કંઈક અલગ કરવાનું જોખમ લીધું. દર્શકોને કંઈક નવું આપવાની ચેલેન્જ ઉઠાવી. મોટા ભાગે તેઓ સફળ પણ થયા છે.

કુછ ખટ્ટા, કુછ મીઠા !

આ ફિલ્મની વાર્તાની વાત કરીએ તો 47 ધનસુખ ભવન નામ પ્રમાણે જ એક બિલ્ડિંગની આસપાસ રચાતી વાર્તા છે. ત્રણ ભાઈઓ પોતાના વારસાગત મકાનમાં જાય છે. મકાન ખાલી થઈ રહ્યું છે. જ્યાં તેમને તેનું બાળપણ યાદ આવે છે. જો કે સ્ટોરી આ ત્રણ ભાઈઓની નથી, સ્ટોરી એક એવા પાત્રની છે ... (હવે આ કહી દઈશ તો ફિલ્મની મજા મરી જશે. બેટર છે કે કદાચ તમે જ એક વાર જોઈ લો.) આ ફિલ્મની ખાસિયત બે છે એક ફિલ્મ પહેલી ગુજરાતી વન શોટ મૂવી છે. એટલે કે ફિલ્મ આખી એક જ વારમાં શૂટ થઈ છે. અને બીજું ફિલ્મની લંબાઈ માત્ર 107 મિનિટ છે. જો કે ભારતમાં 100 મિનિટની ફિલ્મ બનાવવી જરૂરી છે, એટલે મર્યાદા સમજી શકાય એમ છે, કદાચ એના કારણે જ સીન ખેંચાય છે. પરંતુ એક જુદા જ પ્રયત્ન સામે એને સાંખી શકાય. અને હા એક મજાની વાત એ છે કે તમે ફિલ્મના જોનર માં કન્ફ્યુઝ થઈ જશો કે આ હૉરર છે કે થ્રિલર. અને એઝ અ ડિરેક્ટર નૈતિક રાવલ અહીં જ સફળ થાય છે.

એક્ટિંગમાં અવ્વલ

એક્ટિંગની વાત કરીએ તો ગૌરવ પાસવાલા ઈમ્પ્રેસિવ છે. ખાસ કરીને ક્લાઈમેક્સમાં તમને ગૌરવને જોવાની મજા આવશે. ઋષિ વ્યાસ પણ મોટા ભાઈ તરીકે જામે છે. શ્યામ નાયરે પાત્રને આત્મસાત કર્યું છે. જો કે સ્ટોરી ક્યાંક ક્યાંક ખેંચાય છે. કેટલીવાક તો એવું થાય કે આ હવે બીજો ડાઈલોગ બોલશે કે નહીં. પણ પોઝિટિવ બાબત છે ફિલ્મનો એન્ડ. ફિલ્મનો એક જુદા જ પ્રકારનો એન્ડ તમને ચોંકાવી શકે છે. છેલ્લે આવતું ટ્વિસ્ટ ઝાટકો આપવા પૂરતુ છે. અને કહેવાય છે કે જે તમે ધાર્યું છે એના કરતા કંઈક અલગ આવેને એ જ ડિરેક્ટરની સફળતા.

અહીં ખૂંચે છે

ફિલ્મમાં ખામીઓ ઘણી છે. સ્ટોરી ખેંચાયા કરે છે. લાંબા સમય સુધી કંઈ નવું બનતું નથી. જો કે સાઉન્ડ ઈફેક્ટ કેટલાક સીનને રસપ્રદ બનાવે છે. કદાચ જોવામાં અને સમજવામાં થોડી અઘરી લાગી શકે છે. એકના એક ડાઈલોગથી કંટાળી જવાય. અને હા કેટલાક સવાલોના જવાબ ફિલ્મમાં જ મળી જવા જોઈતા હતા. જે નથી મળતા.

આ છે ફિલ્મની વિશેષતા

જો કે ગુજરાતી ફિલ્મ ઈન્ડસ્ટ્રી અને દર્શકો તરીકે ગૌરવ લેવા જેવી વાત એ કે આ પહેલી ગુજરાતી વન શોટ ફિલ્મ છે, એટલે કે એવી ફિલ્મ જેમાં ક્યાંય કોઈ જ કટ નથી. ફિલ્મનો પહેલો સીન તમે જુઓ ત્યાંથી એન્ડ આવે ત્યાં સુધી એક જ વખત કેમેરો શરૂ કર્યા પછી ફિલ્મ શૂટ થઈ છે. સમજી શકાય એવી વાત છે કે અહીં રિટેકને જગ્યા નથી. એટલે એક્ટર્સે જે રીતે સ્ક્રીપ્ટને ગ્રાસ્પ કરી છે. તે દાદ આપવા લાયક છે. વળી જે સીન લાંબા લાગે એ પણ આ જ કારણે કે ફિલ્મમાં એડિટ કરવાનો ઓપ્શન નથી. એટલે પણ ફિલ્મ લાંબી લાગી શકે છે.
સરવાળે વાત કરીએ તો ગુજરાતી ફિલ્મ ઈન્ડસ્ટ્રીનો એક નવતર પ્રયોગ છે. આવું રિસ્ક લેવા બદલ આખી ટીમને વખાણવી જ રહી.


તા. ક.: ફિલ્મોના શોખીનોએ અને ફિલ્મ બનાવવતા ઈચ્છતા લોકોએ તો જોવી જ જોઈએ.

હાર્દિક ચૌહાણે માત્ર 45 મિનિટમાં જર્મનોને તૈયાર કરાવ્યું ‘મોર બની થનગાટ કરે’

કોન્સર્ટ દરમિયાન જર્મન સિંગર્સને ગાઈડ કરી રહેલા હાર્દિક Image Courtesy: Jonathan Schoeps

ગુજરાતીમાં કહેવત છે કે જ્યાં જ્યાં વસે ગુજરાતી, ત્યાં ત્યાં સદાકાળ ગુજરાત. અને આ કહેવત સાચી પડે તેવા હજારો દાખલા આપણે સાંભળ્યા છે. તાજેતરમાં જ સોશિયલ મીડિયા પર એક વીડિયો વાઈરલ થયો છે. જેનાથી પણ આ કહેવત શતપ્રતિશત સાચી પડી રહી છે. આ વીડિયો કદાચ તમે પણ જોયો હશે. જેમાં સફેદ શર્ટ અને બ્લેક પેન્ટ પહેરેલો એક યુવાન વિદેશી લોકોની વચ્ચે ગુજરાતી ગીતો ગાય છે. ઝવેરચંદ મેઘાણીની રચના મન મોર બની થનગાટ કરે અને ગુજરાતી ફિલ્મનું ગીત ગોરી રાધાને કાળો કાન ગાય છે. એટલું જ નહીં પાછળ ઉભેલા અન્ય વિદેશી ગાયકોને ગવડાવે પણ છે. આ વીડિયો સોશિયલ મીડિયા પર આગની જેમ ફેલાયો છે. વિશ્વ ભરના ગુજરાતીઓ આ યુવાન પર ઓવારી ગયા છે. શુભેચ્છાઓની વર્ષા થઈ રહી છે, સાથે જ ગોરાઓને ગુજરાતી ગાતા કરનાર આ યુવાન કોણ છે તે સવાલ પણ થઈ રહ્યો છે. ત્યારે gujaratimidday.com ના પ્રતિનિધિ ભાવિન રાવલે જર્મનીમાં રહેતા હાર્દિક ચૌહાણ સાથે ખાસ વાતચીત કરી.

જર્મનીમાં મેડિકલ એન્જિનિયરિંગ ભણે છે હાર્દિક

ઈન્ટરનેટ સેન્સેશન બની ચૂકેલા હાર્દિક ચૌહાણ મૂળ ઈડરનો છે, જો કે વર્ષોથી તેમનો પરિવાર અમદાવાદમાં સ્થાયી થયો છે. હાર્દિક છેલ્લા ત્રણ વર્ષથી જર્મનીમાં છે, જ્યાં તે મેડિકલ એન્જિનિયરિંગનો અભ્યાસ કરી રહ્યો છે. તો પછી મ્યુઝિક કેવી રીતે ? આ સવાલનો જવાબ હાર્દિકના પરિવારમાં છુપાયેલો છે. હાર્દિકનું કહેવું છે કે ગાવું એ મારો શોખ છે. ટેલેન્ટ છે અને હું ગાયા વિના નથી રહી શક્તો, એટલે જર્મનીમાં અહીં વિદ્યાર્થીઓનું ગ્રુપ છે, તેમની સાથે ગાઉં છું.


ગળથૂથીમાં જ મળ્યું છે સંગીત

તમને જાણીને આશ્ચર્ય થશે કે હાર્દિક માટે ગાયન અને સંગીત એ લોહીમાં જ છે. હાર્દિકના પરિવારમાં માત્ર તે પોતે જ એવા વ્યક્તિ છે, જે હાલ સિંગિંગથી દૂર છે. હાર્દિકના પિતા કમલેશ ચૌહાણ મ્યુઝિક ટીચર છે, કાકા મ્યુઝિક ટચર છે. તો હાર્દિક કહે છે કે મારા દાદીના પપ્પા પણ સંગીત શીખવતા. હાર્દિકના ભાઈ પણ મ્યુઝિક કંપોઝ કરે છે અને ગાય છે. એટલે સુધી કે અમદાવાદમાં હતા ત્યાં સુધી હાર્દિક પોતે પણ ગુજરાતી નાટકોમાં એક્ટિંગની સાથે સાથે સંગીત આપી ચૂક્યા છે. જો કે હાર્દિકે ગાયકીની કોઈ પ્રોફેશનલ તાલીમ નથી લીધી. આ અમદાવાદી યુવાન કહે છે કે 10મા ધોરણ સુધી હું ગમે તે રીતે ગાતો હતો. પણ પછી પપ્પાએ બેઝિક ગાવાનું શીખવ્યું, એ રીતે હું ગાતા શીખ્યો. હાર્દિકના પપ્પા કમલેશ ચૌહાણ જાણીતા મ્યુઝિશિયન છે, તેઓ ગુજરાતી નાટકોમાં પણ સંગીત આપે છે. આ ઉપરાંત હાર્દિક પોતે જાણીતા ગ્રુપ દર્પણામાં મ્યુઝિક પ્રોડક્શન કરી ચૂક્યા છે.
45 મિનિટમાં જ હાર્દિકે જર્મનીઓને ગુજરાતી ગીત શીખવ્યું
જો કે જર્મનીમાં જર્મન લોકોને ગીત ગુજરાતી ગીત ગવડાવવું એ ચેલેન્જ તો છે જ. જો કે હાર્દિકના કહેવા પ્રમાણે તેમણે આ તૈયારી માત્ર 45 મિનિટમાં જ કરી હતી. જી હાં, હાર્દિકે માત્ર 45 મિનિટમાં આ ગીત કમ્પોઝ કર્યા અને જર્મન સિંગર્સને ગુજરાતી ગાતા શીખવ્યું. હાર્દિક હે છે કે આ જે ગ્રુપનો વીડિયો વાઈરલ થયો છે, તેમની સાથે હું છેલ્લા દોઢ વર્ષથી ગાઉં છું અને આ ગ્રુપ 70 વર્ષ જુનું છે. આ ગ્રુપ ફ્રીડરિશ શીલર યુનિવર્સિટીના વિદ્યાર્થીઓનું છે જેમની સાથે મેં છ મહિના પહેલા 31 ડિસેમ્બરે ગાયું હતું. તે સમયે ઉજવણી માટે બધા અંગ્રેજી અને કેરલ સોંગ્સ ગાત હતા. તો ફ્રેન્ડ્ઝે કહ્યું કે હાર્દિક તુ સારુ ગાય છે તો તુ પણ ગાને. જો કે મને અંગ્રેજી ગીતો નહોતા ગાવા. એટલે મં ગ્રુપના લીડર ફાબિયાનને કહ્યું હું ગુજરાતી ગાઈશ. અને પહેલીવખત મેં મન મોર બની થનગાટ ગાયું. એ બધાને એટલું ગમ્યું કે ફાબિયાને મને આ ગ્રુપની 70મી એનિવર્સિરી નિમિત્તે થનારા કોન્સર્ટમાં ગાવા માટે આમંત્રણ આપી દીધું. અને બીજા દિવસે થનારા શોમાં ગાવા પણ કહી દીધું.

45 મિનિટમાં જ જર્મનોને ગુજરાતી ઉચ્ચાર શીખવવા એક ચેલેન્જ હતી

હાર્દિક કહે છે કે પહેલા દિવસે તો મેં એકલાએ ગીત ગાયું હતું, અને બાકીના સિંગર્સે હમિંગ કર્યું. પણ આટલા સારા ટેલેન્ટેડ સિંગર્સ હતા, તો મારે બધાને ગવડાવવું હતું. પણ કોન્સર્ટ માટે સમય ખૂબ ઓછો હતો, ઉપરથી કુલ 20 જેટલા સોંગ હતા. એટલે મારી પાસે તૈયારી માટે માત્ર 45 મિનિટ જ હતી, એમાં મારે તેમને ગુજરાતી ઉચ્ચારો શીખવવાના હતા, ગીત સમજાવવાનું હતું. અઘરું હતું, પણ બોલી બોલીને મેં તેમને શીખવ્યું અને બધાએ ઝડપથી કેચઅપ પણ કરી લીધું. જો કે વચ્ચે વચ્ચે મારે ક્યૂ આપવી પડી, પણ જે તૈયાર થયું એ તો હવે દુનિયા આખી જોઈ ચૂકી છે. હાર્દિકે જ્યારે પહેલીવાર કોન્સર્ટમાં આ કમ્પોઝિશન રજૂ કર્યું ત્યારથી જ લોકોને ખૂબ ગમ્યું. હાર્દિક કહે છે કે જર્મન લોકોને ન હોતું સમજાયું તેમ છતાંય તેઓને ગીત ખૂબ ગમ્યું હતું. એક કિસ્સો યાદ કરતા હાર્દિક કહે છે કે એક વખત એક કાર્યક્રમમાં મેં વૈષ્ણવ જન ગીત ગાયું હતું. ત્યારે ભારતીય મૂળના એક જર્મન વ્યક્તિને એટલું ગમી ગયું તે ભાવુક થઈ ગયો અને મને મળવા આવ્યો. એટલે સંગીતને સરહદ નથી નડતી.

સોશિયલ મીડિયામાં વાઈરલ થયો છે હાર્દિકનો વીડિયો

હાર્દિકનો આ વીડિયો હાલ તો વિશ્વભરમાં પહોંચી ચૂક્યો છે, હાર્દિક લિટરલી એક ઈન્ટરનેટ સેલેબ બની ચૂક્યા છે. જો કે હાર્દિક કહે છે કે,'મેં કંઈ ખાસ નથી કર્યું. મેં બસ ગાયુ છે અને લોકોને ગમ્યું છે.' તો હવે આગળ શું ? હાર્દિક કહે છે કે હાલ તો મારે માસ્ટર્સ પુરુ કરવું છે, કારણ કે મારું ભણવાનું જર્મન લેંગ્વેજમાં છે, એના માટે મેં આ ભાષા શીખી છે. એટલે પ્રાયોરિટી તો માસ્ટર્સની છે, પણ સંગીત ક્યારેય છૂટશે નહીં. હાર્દિક જર્મન ભાષામાં પણ ગીતો ગાય છે. જર્મનીમાં પણ હાર્દિક ગુજરાતી ગીતો ગાઈ લોકપ્રિય થઈ ચૂક્યા છે, લોકો તેમને કોન્સર્ટ માટે આમંત્રણ આપે છે. હાર્દિક બોલીવુડ સોંગ્સની સાથે સાથે પોતે કમ્પોઝ કરેલા ગીતો પણ ગાય છે.

'જ્યાં પણ રહીશ, જે પણ કરીશ, મ્યુઝિક ક્યારેય નહીં છોડું'


હાર્દિકનું કહેવું છે કે સંગીત સાથે તેને ખૂબ લગાવ છે, એટલે તે ભારતમાં રહે કે જર્મનીમાં સંગીત ક્યારેય નહીં છૂટે. સાથે જ હાર્દિક ગુજરાતી ફિલ્મમાં ટ્રાય કરવાની શક્યતા પણ વ્યક્ત કરી રહ્યા છે. હાર્દિક ચૌહાણનું કહેવું છે,'હા, હું ગુજરાતી ફિલ્મોમાં ટ્રાય કરી શકું છું.' મહત્વનું છે કે તેનો આ વીડિયો વાઈરલ થયા બાદ હાર્દિકની લાઈફમાં કોઇ ફેર નથી પડ્યો અને તેની લાઇફ રૂટિન ચાલી રહી છે. હાર્દિક કહે છે કે સંખ્યાબંધ લોકો મને કોંગ્રેચ્યુલેશન આપી રહ્યા છે. પણ બધાને જવાબ આપવો શક્ય નથી. એટલે gujaratimidday.comના માધ્યમથી હું બધાનો આભાર માનું છું. આ વીડિયોને પસંદ કરવા બદલ તમારા બધાનો ખૂબ ખૂબ આભાર.

Andy Kadiwar:મળો એવા ગુજરાતીને જેમણે દિવ્યાંગો માટે રાખી છે 10 % અનામત

એન. ડી. કડીવાર

શિક્ષણ અને નોકરીમાં અનામતને લઈ ચર્ચાઓ ખૂબ થઈ છે. એમાંય ગુજરાતમાં તો આ મુદ્દે જબરજસ્ત આંદોલન પણ થયું. જો કે આપણે આજે જ્ઞાતિ આધારિત અનામતમાં નથી જવાનું. આજે વાત એક એવી અનામતની કરવી છે, જેમને કદાચ ખરેખર અનામતની જરૂર છે. એને અનામત કરતાંય પ્રોત્સાહન કહીએ તો વધું યોગ્ય રહેશે.

એન્ડી કડીવાર. મૂળ અમદાવાદના આ બિઝનેસ મેન 1996માં યુએસ ગયા. અને આજે તો અમેરિકાના ફ્લોરિડામાં સ્થાયી થઈ ચૂક્યા છે. અને અમેરિકામાં જ Intigrated resources pvt ltd નામની કંપની ચલાવે છે. એન્ડી કડીવારની કંપનીની અમેરિકામાં ત્રણ ઓફિસ છે, અને ભારતમાં 4 ઓફિસ છે. આ યુએસ બેઝ્ડ કંપની અમેરિકન કંપનીઓના જુદા જુદા પ્રોજેક્ટ્સ સંભાળે છે. કંપનીના પીઆર ધરા પટેલ કંપની વિશે માહિતી આપતા કહે છે કે,'અમેરિકાની જુદી જુદી કંપનીઓ માટે અમારી કંપની રિક્રુટિંગનું કામ કરે છે.' જો કે આ એન્ડી કડીવારની આ કંપની એટલા માટે ખાસ છે કે આ કંપનીમાં દિવ્યાંગ લોકો માટે 10 ટકા અનામત રાખવામાં આવી છે. એટલે કે કંપની મૂકબધિર, શારીરિક કે માનસિક રીતે દિવ્યાંગ લોકોને નોકરી માટે ભરતી કરે છે. કંપનીના પીઆર ધરા પટેલનું કહેવું છે કે,'દિવ્યાંગ લોકોને ભરતી કરી તેમને પગાર સામાન્ય વ્યક્તિઓ જેટલો જ આપવામાં આવે છે.'

ઈન્ટિગ્રેડેટ રિસોર્સિસ કંપનીના માલિક એન્ડી કડીવારે આ શરૂઆત કરાવી છે. દિવ્યાંગોને નોકરી આપવાનો વિચાર કેવી રીતે આવ્યો તેના જવાબમાં કડીવારનું કહેવું છે,'હું NRI છું, ઘણી NGOs અમારી પાસે ફંડ માગતી હોય છે. વિદેશમાં ફંડ માગવા આવતા હોય છે. ફંડ આપવામાં મને વાંધો નથી, પણ મને એ જાણવામાં રસ હતો કે તે યુઝ ક્યાં થાય છે. એટલે એ જફામાં પડવા કરતા મેં જરૂરિયાત મંદ લોકોને સીધા જ મદદ કરવાનું વિચાર્યું. એવું ઈનિશિયેટિવ લેવું હતું કે જેને ખરેખર જરૂર છે, તેને મદદ થાય. તરછોડાયેલા લોકોને મદદ થાય. એમાં વિચાર કરતા કરતા દિવ્યાંગ લોકોને પ્રોત્સાહન આપવાનો વિચાર આવ્યો અને તેના પર અમલ મારી જ કંપનીથી કરવાની શરૂઆત કરી.'

સેરેબ્રલ પાલ્સી છતાંય કામ કરે છે રાજવી

જો કે કંપનીમાં દિવ્યાંગ લોકોને કામ આપવું એ બોલવા જેટલું સહેલું નહોતું. કારણ કે એક તો કામની સ્પીડ ઘટી જાય, વળી કમ્યુનિકેશનની પણ મુશ્કેલી ઉભી થાય. સાથે જ કંપનીના અન્ય કર્મચારીઓ દિવ્યાંગ લોકો સાથે કેવી રીતે કામ કરશે એ પણ પ્રશ્ન હતો. એટલા માટે આ નિર્ણય લેતા પહેલા એન્ડી કડીવારે પોતાના કર્મચારીઓ સાથે વાત કરી. કંપનીઆ પ્રોજેક્ટની જવાબદારી ધરા પટેલને સોંપી છે. ધરા પટેલનું કહેવું છે કે આ પ્રોજેક્ટનો અમલ કરતા પહેલા મેં અમદાવાદની જુદી જુદી એનજીઓ સાથે મુલાકાત કરી. દિવ્યાંગ લોકોની સ્કીલ જાણી, એમના વિશે રિસર્ચ કર્યું. તેમની પાસેથી કામ કેવી રીતે લઈ શકાય તેનું રિસર્ચ કર્યું. દિવ્યાંગ લોકો સાથે અન્ય સ્ટાફ સારી રીતે કામ કરી શકે એટલા માટે કંપનીએ પોતાના એમ્લોયીઝને પણ તાલીમ આપી છે. ખાસ તેની પ્રોસેસ નક્કી કરવામાં આવી છે.

બાદમાં કંપનીએ જુદા જુદા પ્લેસમેન્ટમાં જઈ દિવ્યાંગ લોકો સાથે વાતચીત કરી તેમને હાયર કરવાની પ્રોસેસ શરૂ કરી છે. તમને જાણીને આશ્ચર્ય થશે કે એન. ડી કડીવારની કંપની ઈન્ટિગ્રેટેડ રિસોર્સિસમાં હાલ સેરેબ્રલ પાલ્સીથી પીડિત યુવતી કામ કરી રહી છે. તેને એક હેલ્પર પણ આપવામાં આવ્યો છે. જેથી કામમાં મદદ થઈ શકે. સાથે જ કંપનીના તમામ કર્મચારીઓ પણ તેને મદદ કરવા તત્પર રહેતા હોય છે. સરવાળે કંપનીમાં ટીમ બિલ્ડિંગનું વાતાવરણ વધુ મજબૂત થયું છે. હજી તો કંપનીએ એક જ દિવ્યાંગને નોકરી આપી છે, પરંતુ હાલ કંપની વધુ લોકો સાથે વાતચીત કરીને તેમની સ્કીલ જાણી રહી છે. સાથે જ તેમને ઉપયોગમાં લઈ પ્રોત્સાહન આપી શકાય તે માટે તાલીમ પણ આપી રહી છે.


એન્ડી કડીવારનું કહેવું છે કે,'અમને ખબર છે કે તેમનાથી બીજા જેટલું કામ નથી જવાનું, અને તેમની સેલરી કદાચ કંપની માટે લોસ થઈ શકે. પરંતુ આ રીતે અમે તેમને કંઈક કરવાનું પ્રોત્સાહન આપી રહ્યા છીએ. તેમને સ્વીકારી રહ્યા છીએ. અને બસ મારે આવું જ કંઈક કરવું હતું.' ઉલ્લેખનીય છે કે દિવ્યાંગ લોકો માટે જીંદગી ગુજરાવી દોજખ થઈ જતી હોય છે. ત્યારે આ પ્રકારના ઈનિશિયેટિવ તેમને મદદરૂપ થઈ શકે છે.

ફિરોઝ ઈરાનીઃ વાંચો આજકાલ શું કરી રહ્યા છે ગુજરાતી ફિલ્મોના આ જાણીતા વિલન

ફિરોઝ ઈરાની, આ નામ પડે એટલે ગુજરાતી ફિલ્મોના એવા અને પાત્રો આંખ સામે આવી જાય, જે એક સમયે ગુજરાતી ફિલ્મોમાં હીરોને પજવતા હતા. ફિરોઝ ઈરાની એટલે એક એવા એક્ટર જેમણે લાંબા અરસા સુધી ગુજરાતી ફિલ્મોમાં વિલન તરીકે જબરજસ્ત ઓળખ બનાવી. નરેશ કનોડિયા હોય કે ઉપેન્દ્ર ત્રિવેદી, એક સમય એવો હતો કે લીડ એક્ટર, હીરો બદલાય પરંતુ વિલન તરીકે તો ફિલ્મમં ફિરોઝ ઈરાની જ હોય. અને ફિરોઝ ઈરાનીને સ્ક્રીન પર જોઈને ડર પણ લાગે. જો કે રિયલ લાઈફમાં ફિરોઝ ઈરાની ખૂબ જ અલગ છે. રિયલ લાઈફમાં આપણા આ પારસી અદાકાર સિમ્પલ છે, જોલી છે. આજે 70 વર્ષની વયે પણ તેઓ ફિલ્મ ઈન્ડસ્ટ્રીમાં એક્ટિવ છે.



કેવું જીવન વીતાવે છે ફિરોઝ ઈરાની ?

જી હાં, માત્ર અમિતાભ બચ્ચન જ એવા નથી જે આ ઉંમરે ફિટ રહીને એક્ટિંગ કરે છે. આપણી ગુજરાતી ફિલ્મોના આ જાણીતા કલાકાર પણ 70નો આંક વટાવ્યા બાદ પણ એક્ટિંગ કરે છે, અને ફિટ પણ રહે છે. તમને સવાલ થશે કે જેણે દાયકાઓ સુધી ગુજરાતી ફિલ્મોમાં એક્ટિંગ કરી એ ફિરોઝ ઈરાની આજકાલ શું કરી રહ્યા છે. અન્ય ગુજરાતી કલાકારોની જેમ તેમની લાઈફ કેવી છે. આ સવાલોના જવાબ તમારા માટે gujaratimidday.com લઈને આવ્યું છે. અમે ફિરોઝ ઈરાની સાથે વાત કરીને તેમની લાઈફ વિશે કેટલીક રસપ્રદ માહિતી મેળવી છે.



ટૂંક સમયમાં દેખાશે ગુજરાતી ફિલ્મમાં

ફેન્સ માટે સારીવાત એ છે કે ટૂંક સમયમાં જ ફિરોઝ ઈરાની સિલ્વર સ્ક્રીન પર ફરી એકવાર ગુજરાતી ફિલ્મમાં નજરે પડશે. જી હાં, ફિરોઝ ઈરાની આજકાલ પણ ગુજરાતી ફિલ્મોમાં એક્ટિવ છે. તાજેતરમાં જ તેઓ યુએસમાં 'ગુજરાતનું ગૌરવ' નામની ફિલ્મનું શૂટિંગ પુરુ કરી ચૂક્યા છે. તો આગામી મહિને એટલે કે ઓગસ્ટમાં તેમની ફિલ્મ 'મિ. કલાકાર' રિલીઝ થવાની છે. આ ફિલ્મથી તેઓ પોતાના પુત્ર અક્ષત ઈરાનીને લોન્ચ કરી રહ્યા છે. અન ફિલ્મ મિ. કલાકરને તેમણે ડિરેક્ટ પણ કરી છે. આ સહિત વધુ એક ગુજરાતી ફિલ્મનો તેઓ ભાગ બની રહ્યા છે, જેનું શૂટિંગ પણ યુએસમાં થવાનું છે, પરંતુ હજી સુધી તેનું નામ નક્કી નથી થયું. આ ઉપરાંત ફિરોઝ ઈરાની બોલીવુડમાં પણ સક્રિય છે. તાજેતરમાં જ તેમણે બોલીવુડ મૂવી 'ઉલ્ટે'નું શૂટિંગ પુરુ કર્યુ છે.

70 વર્ષે પણ 2 કલાક સુધી કરે છે એક્સરસાઈઝ

ફિરોઝ ઈરાની હાલ મુંબઈના ગોરેગાંવ વિસ્તારમાં રહે છે. તેઓ મુંબઈમાં જ જન્મ્યા અને મોટા થયા છે. જો કે gujaratimidday.com સાથે વાત કરતા તેઓ કહે છે કે,'મારી 75 ટકા જિંદગી ગુજરાતમાં જ ગઈ છે. ગુજરાતની જનતાએ મને અદભૂત પ્રેમ આપ્યો છે.' તમને જાણીને આશ્ચર્ય થશે કે ફિરોઝ ઈરાની આજે 70 વર્ષની ઉંમરે પણ રોજ દોઢથી બે કલાક જિમમાં કસરત કરે છે. પોતાના જિમ રૂટિન વિશે વાત કરતા ફિરોઝભાઈ કહે છે કે,'હું ઉઠીને જિમમાં જાઉં, ત્યાં કસરત કરું અને પછી સ્વિમિંગ કરવા જાઉં. આમ રોજ દોઢથી 2 કલાક સુધી મારું એક્સરસાઈઝનું શેડ્યુલ હોય છે.' 70 વર્ષે તેમની ફિટનેસનો આ જ તો રાઝ છે.

આવી છે પર્સનલ લાઈફ


પર્સનલ લાઈફની વાત કરીએ તો ફિરોઝ ઈરાની દાદા બની ચૂક્યા છે. તેમને બે પુત્રો છે. જેમાંથી એક પુત્ર અભિષેક ઈરાની હાલ સ્વિટ્ઝર્લેન્ડમાં સ્થાયી થઈ ચૂક્યો છે, અને તેને બે બાળકો પણ છે. તો બીજા પુત્ર અક્ષત ઈરાની મુંબઈમાં જ છે. અને અક્ષતને ફિરોઝ ઈરાની ગુજરાતી ફિલ્મથી લોન્ચ કરી રહ્યા છે. ઉલ્લેખનીય છે કે ફિરોઝ ઈરાનીના પિતા ફરેદુન ઈરાની નાટક કંપની ચલાવતા હતા. એફ આર ઈરાની તરીકે જાણીતા ફરેદુન ઈરાનીની લક્ષ્મી કલાકેન્દ્ર નામે ડ્રામા કંપની હતી. જેનાથી જ ફિરોઝ ઈરાનીએ એક્ટિંગની શરૂઆત કરી હતી. 8 વર્ષની ઉંમરે તેમણે છોરુ કછોરું નામના નાટકમાં કામ કર્યું હતું. અને 1967માં 17 વર્ષની ઉંમરે 'ગુજરાતણ' નામની ફિલ્મથી વિલન તરીકે ગુજરાતી ફિલ્મોમાં ડેબ્યુ કર્યો હતો. જેમાં વિજય દત્ત હીરો હતા અને અરૂણા ઈરાની હિરોઈન હતા. બસ પછી તો ફિરોઝભાઈ પોતાની કરિયરમાં સંખ્યાબંધ હિટ ફિલ્મો આપી ચૂક્યા છે.

ધવલ દોમડિયા:શોખે બનાવી દીધો સેલિબ્રિટી, વાંચો રસપ્રદ ખુલાસા

ધવલ દોમડિયા

જો તમે સોશિયલ મીડિયા પર સતત એક્ટિવ હશો તો તમને ગુજ્જુ કોમેડીના નામે વીડિયોઝ જોવા મળતા જ હશે. અને તમે જિગલીના પાત્રથી પણ પરિચિત હશો. કદાચ તમને આ જિગલીનું પાત્ર ગમતું પણ હોય અને તમારા ખરાબ મૂડમાં તમને ખડખડાટ હસાવતું પણ હોય. જો તમે પણ જિગલીના ફેન છો, તો આજે અમે તમને મળાવીશું એક એવા વ્યક્તિને જેણે જિગલીના પાત્રને જન્મ આપ્યો, એટલું જ નહીં ગુજરાતીઓના હોઠે રમતું કરી દીધું.

વાત છે જૂનાગઢના યુવક ધવલ દોમડિયાની, જે હવે સ્ટાર બની ચૂક્યો છે. ધવલ દોમડિયા પહેલો ગુજરાતી યુટ્યુબર છે જેની યુટ્યુબ ચેનલના સબસ્ક્રાઈબરની સંખ્યા 10 લાખને પાર પહોંચી ચૂકી છે. હાલ ધવલ દોમડિયાની યુટ્યુબ ચેનલના સબસ્ક્રાઈબર 12,51,081 છે, જે દિવસેને દિવસે સતત વધી રહ્યા છે. આ સૌથી લોકપ્રિય ગુજરાતી યુટ્યુબ સ્ટાર સાથે gujaratimidday.comએ વાતચીત કરી, અને જાણવાની કોશિશ કરી તે ધવલ આ સફળતા બાદ શું કરી રહ્યા છે. તેમને વીડિયોઝના આઈડિયાઝ ક્યાંથી આવે છે ? યુટ્યુબર બનવા માટે શું કરવું જોઈએ ? આ સવાલો તમારા મનમાં પણ હશે. તો આ આર્ટિકલમાં વાંચો તમારા ગમતા યુટ્યુબસ્ટારના પોતાના શબ્દોમાં તેમની પોતાની કહાની.


 શોખ માટે કરી હતી શરૂઆત

ધવલ દોમડિયા મૂળ જૂનાગઢના છે. જૂનાગઢ સિટી જ તેમનું વતન છે. મોટા ભાગના ક્રિએટિવ લોકોની જેમ ધવલ પણ એન્જિનિયર છે. ધવલે મિકેનિકલ એન્જિનિયરિંગનો અભ્યાસ કર્યો છે. જો કે ધવલને પહેલેથી જ ટિપિકલ જોબ કરવાની ઈચ્છા નહોતી. એટલે એન્જિનિયરિંગ કરતા સમયે જ તે સેલ્ફી વીડિયોઝ ક્રિએટ કરતા. ધવલ શરૂઆતમાં ઈન્સ્ટાગ્રામ પર જુદા જુદા પાત્રોમાં ઢળીને જુદા જુદા મુદ્દાઓ પર ક્રિએટિવ વીડિયોઝ બનાવીને પોસ્ટ કરતા. ધવલ કહે છે આ વીડિયોઝને સારો રિસ્પોન્સ મળ્યો. લોકોએ મને વધુ વીડિયોઝ બનાવવા કહ્યું એટલે પછી મેં યુટ્યુબ ચેનલ શરૂ કરી. અને પ્રોપર શૂટ કરીને વીડિયોઝ બનાવ્યા. અને બસ લોકોને મજા પડવા લાગી.

પરિવાર પણ જુએ છે વીડિયોઝ

ક્યારેય યુટ્બુયને લઈ ઘરમાં મતભેદ થયા આ સવાલના જવાબમાં ધવલનું કહેવું છે કે આમ તો મારા પરિવારને મારાથી કોઈ વાંધો નહોતો, જિગલી બનતો ત્યારે પણ કોઈ તકલીફ નહોતી થઈ. પણ એક ટાઈમ એવો હતો કે ફેમિલીએ કહ્યું કે આ બધું મૂકી દો અને નોકરીએ લાગી જાવ. અને બે મહિના માટે મેં ખરેખર આ વીડિયો બનાવવાનું છોડી પણ દીધું હતું. પણ આ કર્યા વગર રહેવાયું નહીં. આખરે ઘરના લોકો માની ગયા. આજે તો સ્થિતિ એવી છે કે ઘરના બધા લોકો સાથે મળીને મારા વીડિયો જોઈ લે છે. અપલોડ કરું એ પહેલા જ બધા જોઈ લે છે.

જ્યારે ફેમિલી થયું ઈમ્પ્રેસ

આ સાથે જ ધવલ એક અનુભવ યાદ કરતા કહે છે કે પરિવાર સાથે અમે ભવનાથની તળેટીમાં પિકનિક કરવા ગયા હતા. ત્યારે અચાનક કેટલાક યંગસ્ટર્સ મને ઓળખી ગયા અને મારી સાથે સેલ્ફી લેવા આવ્યા. ફેમિલી પિકનિક હતું એટલે પરિવાર સાથે હતો. ત્યારે બધાને મારી સાથે સેલ્ફી લેતા જોઈ ઘરના લોકોને પણ લાગ્યું કે ના આપણો છોકરો કંઈક સારું કરે છે. પરિવારના લોકો પણ ખુશ થઈ ગયા. અને યુટ્યુબની સાથે સાથે હું ક્યારેક પપ્પાના બિઝનેસમાં પણ ધ્યાન આપું છું. એટલે મારું પણ કામ ચાલી જાય છે.

કેમ છોડ્યું જિગલીનું પાત્ર ?

ધવલ દોમડિયા ખૂબ જ જાણીતા યુટ્યુબર નીતિન જાની ઉર્ફે ખજૂરભાઈ સાથે પણ કોલાબ્રેશન કરી ચૂક્યા છે. ધવલ કહે છે કે આવું જ રહેશે નામની ગુજરાતી ફિલ્મ માટે અમે ભેગા થયા હતા. તેમને મારા વીડિયોઝના કન્સેપ્ટ ગમ્યા અને મને અપ્રોચ કર્યો. અમે સાથે ઘણા વીડિયોઝ બનાવ્યા. પરંતુ સમયાંતરે બંને વચ્ચે ક્રિએટિવ મતભેદ હતા. જો કે ધવલ દોમડિયા પોતે પોતાનું સૌથી ફેમસ જિગલીનું પાત્ર કેમ છોડ્યું તે અંગે કોઈ ખુલાસો નથી કરી રહ્યા.

આ રીતે નક્કી થાય છે સબ્જેક્ટ

વીડિયોઝના સબ્જેક્ટ વિશે વાત કરતા ધવલ કહે છે કે એક વીડિયો ક્રિએટ કરીને પબ્લિશ કરવા પાછળ અમાર 2થી 3 દિવસ જાય છે. સ્ક્રીપ્ટ રેડી કરતા અડધો દિવસ, થાય, શૂટ કરતા એક દિવસ અને એડિંટિંગ કરતા અડધો દિવસ આમ 2-3 દિવસે એક વીડિયો તૈયાર થઈ જાય છે. સબ્જેક્ટ પસંદ કરવા માટે ખાસ કંઈ કરતા નથી. આપમા જીવનમાં કે ગુજરાતીઓના ઘરમાં જે બનતું હોય તે જ સબ્જેક્ટ લઈને મઠારીએ છીએ. અને બસ લોકોને ગમે છે. જો કે એક વીડિયો પાછળ અમારી ટીમના 6થી 7 લોકોની મહેનત હોય છે. ધવલ પોતાની યુટ્યુબ ચેનલ પર દર ત્રણ દિવસે એક વીડિયો અપલોડ કરે છે. ધવલની લોકપ્રિયતા એટલી છે કે યુટ્યુબ પણ તેમને ગોલ્ડન બટનથી નવાજી ચૂક્યુ છે.

ફિલ્મોમાં દેખાશે ધવલ

ધવલના ફેન્સ માટે સારી વાત એ છે કે ધવલ હવે યુટ્યુબથી આગળ વધીને ગુજરાતી ફિલ્મોમાં સક્રિય થવા જઈ રહ્યા છે. ધવલ કહે છે કે આગમી સમયમાં કેટલીક ગુજરાતી ફિલ્મોમાં કામ કરવાનું પ્લાનિંગ છે. આવું જ રેશે બાદ ધવલ ગુજરાતી ફિલ્મોમાં લીડ રોલમાં ટૂંક સમયમાં દેખાવાના છે. જો કે આ માટે ધવલના ફેન્સે થોડી રાહ જોવી પડશે. આ ઉપરાંત ધવલ ગુજરાતી વેબસિરીઝ પર પણ કામ કરી રહ્યા છે.

નવા યુટ્યુબર માટે ટિપ્સ

આજકાલ યુટ્યુબનો જમાનો છે, અને ઘણાબધા યંગસ્ટરને યુટ્યુબથી ફૅમ મેળવવી છે. આવા યુવાનો માટે ધવલ કહે છે કે મેં ફેમસ થવા આ શરુ નહોતું કર્યું, શોખ હતો એટલે કર્યું હતું. આવક મેળવવા વીડિયોઝ નહોતા બનાવ્યા, ધીરે ધીરે ગ્રોથ થયો છે. જો તમારે પણ યુટ્યુબર બનવું હોય તો ફેમસ થવા માટે ન કરો, ખરેખર ક્રિએટિવ કન્ટેન્ટ આપશો તો વ્યુઅર્સ અને યુટ્યુબ બંને વેલકમ કરશે જ. ફેમસ થવા માટે ન કરો, ક્રિએટિવી હશે તો યુટ્યુબ વેલકમ કરશે જ. યુટ્યુબથી ઘર ચાલશે પણ ભોગ આપવો પડશે, મહેનત કરવી પડશે.

પર્સનલ લાઈફની વાત કરતા ધવલ કહે છે કે અંગત રીતે હું મસ્તીખોર છું. મિત્રો સાથે મળીને ધબધબાટી કરવી ગમે છે. ક્યારેક કોઈની સળી કરવાની પણ મજા આવે છે. ફ્યુચર પ્લાનિંગ અંગે ધવલ કહે છે કે હાલ તો ઘરના લોકો લગ્નની વાત પણ કરે છે. કેવી છોકરી જોઈએ એના જવાબમાં ધવલ કહે છે કે મને સામાન્ય છોકરી જોઈએ છે. જે ઘરરખ્ખુ હોય. સાથે જ ફેન્સને પણ ધવલ કહે છે કે આ જ રીતે અમને આવકારતા રહો, અમે પણ તમને વધુ સારી કોમેડી આપવાનો ટ્રાય કરીશું.