શું તમે તમારા લાઈફ પાર્ટનરના પછી એ પત્ની હોય પતિ હોય કે ગર્લફ્રેન્ડ કે બોયફ્રેન્ડ... એમના બેસ્ટ ફ્રેન્ડ છો? ક્યારેય તમે તમારી જાતને આ સવાલ પૂછ્યો છે?

        જ્યાં લાગણી હોય ને, ત્યાં અપેક્ષાઓ હોય.. અને જ્યારે અપેક્ષા પૂરી ના થાય તો અણબનાવ થાય..પણ જરા વિચારો.. ક્યારેય તમને તમારા એકદમ અંગત મિત્ર સાથે આવા અણબનાવ થયા છે કે સંબંધ તૂટવા પર આવી જાય... નહીં ને.. તો પછી પ્રેમમાં કે લગ્નમાં આવું કેમ થાય છે?

        કારણ કે... આપણે સંબંધોને બોજ બનાવી લઈએ છીએ.. પાર્ટનર માટે કંઈક કરીએ.. તો એ જતાવીએ છીએ.. પછી એ મદદ હોય કે સેક્રિફાઈસ.. અને આ જ વસ્તુ આપણા પાર્ટનર માટે પણ ભાર બની જાય છે..

        આપણે આપણા બેસ્ટફ્રેન્ડ માટે કરેલા કામ, મદદ, નાની હોય કે મોટી.. ક્યારેય ગણાવતા નથી.. તો સતત સાથે રહેનાર પાર્ટનરને કેમ ગણાવીએ છીએ? બેસ્ટ ફ્રેન્ડ પણ આપણા માટે ક્યારેય કંઈ કામ ન કરી શકે.. તો એ સંબંધ તોડી નથી નાખતા.. ગુસ્સો કરીએ.. ઝઘડીએ પણ થોડીવાર માટે..

        પરંતુ જો પતિ કે પત્ની આપણા માટે કંઈ ન કરી શકે.. એમના થોટ્સ આપણા કરતા અલગ હોય... તો આપણે એ પચાવી નથી શક્તા... આવું કેમ?

        એટલે જ પાર્ટનરના બેસ્ટ ફ્રેન્ડ બનો... મોટા ભાગની મુશ્કેલી દૂર થઈ જશે... સંબંધોની ગરિમા જાળવો,, પણ માહોલ હંમેશા લાઈટ રાખો... કારણ કે આખરે તો એમની ખુશી, એમની સ્માઈલ જ તો તમાર ખુશી છે ને!

 

સાંજ

       

    મારા માટે સાંજ એટલે હજીય તું જ છે.. આપણે છેલ્લી વાર અહીં બેઠા ત્યારે સાંજ જ તો હતી.. એ દિવસ બાદ, મારા માટે તો નવી સવાર ક્યારેય થઈ જ નથી.

    આજેય દરરોજ સાંજે આ જ વડના ઝાડ નીચે 5 મિનિટ માટેય બેસીને હું તારી યાદો વાગોળું છું..

    તને પણ યાદ હશે જ ને.. આ વડના ઝાડ નીચે ક્યારેક આપણે કલાકો બેસી રહેતા... ક્યારેક શૂન ચોકડીની રમત રમતા.. તો ક્યારેક સમાજની રૂઢિઓની ઉંડી ચર્ચાઓ કરતા... આ જ ચર્ચાઓ બાદ એક દિવસ તો તે મને કહેલું ને.. કે યુ આર ધ બેસ્ટ પર્સન ટુ ગેટ મેરિડ... મને આજેય તારા અવાજમાં એ વાક્ય સંભળાયા કરે છે...

    ખેર, ફરિયાદ નથી કરવી.. આજે ફરી આ હું એ જ ઝાડ નીચે બેસીને લખી રહ્યો છું... અહીંની વડવાઈ જાણે મને અડીને તારા સ્પર્શની યાદ આપી રહી છે..  મકોડાનો ચટકા.. મને તારી મસ્તીભરી ચૂંટલીઓ યાદ કરાવી રહ્યા છે... અને પાંદડાના ખખડવામાં તારું એ ખુલ્લુ હાસ્ય કાનમાં ગૂંજી રહ્યું છે..

    સાચું કહું?... ભલે તું નથી... પણ હજીય અહીંની હવામાં તારી સુગંધ છે... તારું નામ યાદ કરતા જ આવતી હવાની લહેરખી મારા ચહેરા પર એક શરમાળ સ્માઈલ લઈ આવે છે... જ્યારે જ્યારે અહીં બેસું છું, ત્યારે મને લાગતું જ નથી કે તું નથી.

    કાશ... જો એ દિવસે મેં તારુ કહેલું માનીને કાર ધીમે ચલાવી હોત... તો આજે પણ આ ઝાડ નીચે આપણે બંને સાથે બેઠા હોત....

 

Rishi Kapoor: સુપર હિટ ‘મેરા નામ જોકર’ નહીં, પણ આ હતી પહેલી ફિલ્મ!

        રિશી કપૂરને ‘મેરા નામ જોકર’ માટે નેશનલ એવોર્ડ મળ્યો છે. નેશનલ એવોર્ડ મળવો કોઈ પણ એક્ટરનું સપનું હોય છે. અને રિશી કપૂરને આટલો મોટો એવોર્ડ પોતાની પહેલી ફિલ્મ ‘મેરા નામ જોકર’ના કામ માટે મળ્યો, એ નાની સૂની વાત નથી. આ એવોર્ડ મળ્યો ત્યારે તેમની ઉંમર માત્ર 16 વર્ષ હતી. જો કે રસપ્રદ વાત એ છે કે પોતાના જ હોમ પ્રોડક્શન એટલે કે આર. કે બેનરની ફિલ્મ અને જેને ખુદ એમના પિતા રાજકપૂર ડિરેક્ટ કરી રહ્યા હતા, એ ફિલ્મમાં કામ કરવા માટે પણ શરત મૂકવામાં આવી હતી. સાથે જ એક બીજી ઈન્ટ્રેસ્ટિંગ વાત એ પણ છે કે ‘મેરા નામ જોકર’ એ પહેલી ફિલ્મ નથી જ્યારે રિશી કપૂર સિલ્વર સ્ક્રીન પર દેખાયા હતા.

 

આજે તો ચિંટુજી આપણી વચ્ચે નથી. લૉકડાઉન અને કોરોનાના કહેર વચ્ચે કેન્સર જેવી ભયાનક બીમારીએ રિશી કપૂરને આપણી પાસેથી છીનવી લીધા. રિશી કપૂરે કરિયરની બીજી ઈનિંગમાં જે પ્રકારની ફિલ્મો કરી, એ કદાચ એક એક્ટર તરીકે એમના માટે બેસ્ટ હતી. કરિયરના પહેલા તબક્કામાં રિશી કપૂર મોટા ભાગે રોમેન્ટિક હિરો તરીકે જ દેખાયા છે. જો કે બીજી ઈનિંગમાં ‘દો દુની ચાર’, ‘ઔરંગઝેબ’, ‘ડી ડે’, ‘અગ્નિપથ’ જેવી ફિલ્મોમાં એમણે સાવ જ જુદી ભૂમિકા ભજવી. કપૂર પરિવાર બોલીવુડમાં ત્રણ પેઢીથી છે. એટલે નેપોટિઝમની ચર્ચા થવી સ્વાભાવિક છે. કદાચ કપૂર પરિવારના હોવાને કારણે જ માત્ર 16 વર્ષની ઉંમરે તેમને પહેલી ફિલ્મ મળી ગઈ હતી. પણ આ પહેલી ફિલ્મ કરવા માટે ડિરેક્ટર રાજ કપૂર સામે શરત મૂકવામાં આવી હતી.

 

બોલીવુડમાં એક્ટર્સ જાતભાતની શરતો પર કામ કરતા હોય છે, એ નવાઈની વાત નથી. પણ અચરજ એ વાતનું જરૂર હોય કે રિશી કપૂરની પહેલી ફિલ્મ પિતા રાજ કપૂર ડિરેક્ટ કરી રહ્યા હતા, છતાંય એમની સામે શરત શું મૂકવી પડી. હકીકતમાં આ શરત રિશી કપૂરના માતા ક્રિષ્ના રાજ કપૂરે મૂકી હતી. શરત હતી કે રિશી કપૂરનો અભ્યાસ ન બગડવો જોઈએ. કપૂર પરિવાર ત્યારે ચેમ્બુરમાં રહેતો હતો. એક દિવસ ડિનર દરમિયાન રાજ કપૂરે પત્ની કૃષ્ણા પાસે રિશી કપૂરને કાસ્ટ કરવાની મંજૂરી માગી. આ સમયે રિશી કપૂર માત્ર 16 વર્ષના હતા. અને ડિનર ટેબલ પર માતા-પિતાની વાત સાંભળીને મનોમન મલકાઈ રહ્યા હતા. રાજ કપૂર તે સમયે ‘મેરા નામ જોકર’ની તૈયારી કરી રહ્યા હતા, અને એમાં એમને રિશી કપૂરને કાસ્ટ કરવા હતા. ક્રિષ્ના રાજ કપૂરે શરત મૂકી કે શૂટિંગ માત્ર વીકએન્ડમાં જ થશે અને રિશી કપૂરની સ્કૂલ નહીં બગડે, તો જ એ ફિલ્મમાં કામ કરી શક્શે. પછી જો કે આ શરત જાળવી ન શકાઈ, જુદી જુદી જગ્યાએ શૂટિંગ થયું અને ભણવાનું પણ બગડ્યું પણ આ ફિલ્મે રિશી કપૂરને પ્રતિષ્ઠિત નેશનલ એવોર્ડ અપાવ્યો.

 

રિશી કપૂરની એક્ટિંગની શરૂઆત આમ તો ‘મેરા નામ જોકર’થી થઈ. જો કે આ ફિલ્મ પહેલાય તેઓ સિલ્વર સ્ક્રીન પર દેખા દઈ ચૂક્યા હતા. અને ત્યારે એમની ઉંમર હતી માત્ર બે વર્ષ.  જી હાં, ફિલ્મ હતી રાજકપૂરની વધુ એક હિટ ‘શ્રી420’, જેમાં તેઓ નરગીસ સાથે કામ કરી રહ્યા હતા. ‘શ્રી420’નું એવરગ્રીન હિટ સોંગ ‘પ્યાર હુઆ ઈકરાર હુઆ’ તો તમને યાદ હશે જ. જો ગીત યાદ ન હોય તો એકવાર યુટ્યુબ પર જોઈ લેજો, જી હાં જોઈ લેજો. ગીતમાં તમને ત્રણ બાળકો ધોધમાર વરસાદમાં એકબીજાનો હાથ પકડીને ચાલતા જતા દેખાશે. આ ત્રણ બાળકો કોઈ બાળકલાકાર નહીં પણ રિશી કપૂર, રણધીર કપૂર અને તેમની બહેન ઋતુ કપૂર છે.

 

                                     અહીં ક્લિક કરીને જુઓ ગીત

 

આ ગીતના શૂટિંગ વખતે રિશી કપૂર બે વર્ષના હતા, અને તેઓ શૂટિંગ કરવા તૈયાર જ નહોતા. કારણ કે ગીતમાં વરસાદની સિચ્યુએશન હતી, અને આંખમાં પાણી જતા રિશી કપૂરને નહોતું ગમતું. જો કે આખરે આ સિચ્યુએશનમાં નરગીસ તારણહાર સાબિત થયા. નરગીસે નાનકડા રિશી કપૂરને દરેક રિટેક પર કેડબરીની લાલચ આપી, અને આખરે ચિંટુજી શૂટિંગ કરવા તૈયાર થયા.

 

રિશી કપૂરની એક્ટિંગ કરિયર શાનદાર રહી છે. આમ તો કપૂર હોવાને કારણે એમને સતત કામ મળતું રહ્યું, પરંતુ કેટલાક તબક્કે એમને પણ મુશ્કેલી આવી છે. જેમાંથી એક મુશ્કેલી એ હતી કે રિશી કપૂરે જે સમયે ડેબ્યૂ કર્યો, ત્યારે ડિરેક્ટર્સને તેમના લાયક હિરોઈન્સ મળતી જ નહોતી. ‘બોબી’ની હિરોઈન ડિમ્પલ કપાડિયા લગ્ન કરીને કરિયર છોડી ચૂક્યા હતા, તો શર્મિલા ટાગોર અને મુમતાઝ એ સમયે ટોચ પર હતા, એટલે એમને કાસ્ટ નહોતા કરી શકાતા. એટલે ડિરેક્ટર્સ જો રિશી કપૂરને કાસ્ટ કરે તો હિરોઈન કોને બનાવવી એ યક્ષ પ્રશ્ન હતો.. જો કે એની વાત કરીશું ફરી  કોઈવાર... અહીં જ!!

 

શું તમને ખબર છે સુનીલ દત્ત અને નરગીસની લવસ્ટોરી ગુજરાતથી શરૂ થઈ હતી?

 

તસવીર સૌજન્યઃ ક્વીન્ટ.કોમ

નરગીસ બોલીવુડના ગ્રેટ એક્ટ્રેસ અને સુનીલ દત્તની લવસ્ટોરી કેવી રીતે શરૂ થઈ એ કિસ્સો જગજાણીતો છે. હવે તો સંજુ જોયા પછી આપણને કદાચ દત્ત ફેમિલીની બીજી બાબતો પણ ખબર પડી છે. નરગીસજી પોતાના ત્રણે સંતાનો સંજુ, અંજુ (નમ્રતા) અને પ્રિયા દત્તને ખૂબ જ પ્રેમ કરતા હતા. અને બાળકો માટે તેમણે પોતાની ધોમધખતી ફિલ્મી કરિયર પણ છોડી દીધી. જો કે નરગીસજી અને સુનિલ દત્તની લવસ્ટોરીનો રંગ પણ કંઈક આવો જ છે. જેટલો પ્રેમ બાળકો માટે હતો એટલો જ નરગીસજીને સુનિલ દત્ત માટે હતો.

કેમ સુનિલ દત્તને ડુંગળી-લસણ ખવડાવતા હતા નરગીસ?

       

        એટલે સુધી કે જ્યારે સુનિલ દત્તને ફિલ્મમાં ઈન્ટિમેટ સીન શૂટ કરવાના હોય તો નરગીસજીને ઈનસિક્યોરીટી રહેતી. આમ તો નરગીસ ફિલ્મ ઈન્ડસ્ટ્રીમાં સુનિલ દત્ત કરતા સિનીયર હતા. બંને પહેલીવાર મળ્યા ત્યારે નરગીસ જી 46 ફિલ્માં કામ કરી ચૂક્યા હતા. એટલે સ્વાભાવિક છે કે સેટ પર કેવો માહોલ હોય એ તેમને ખ્યાલ જ હોય. સુનિલ દત્તના મિત્ર રાજ ગ્રોવરે એક ઈન્ટરવ્યુમાં કહ્યું જ્યારે ઈન્ટિમેટ સીન શૂટ થવાનો હોય ત્યારે નરગીસ જી સુનિલ દત્તને કાંદા અને લસણવાળુ ભોજન આપતા, જેથી હિરોઈન્સ એમનાથી દૂર રહે.

ગુજરાતની ધરતી પર થઈ શરૂઆત

        આવી મસ્ત મસ્ત લવસ્ટોરીની શરૂઆતમાં ગુજરાતની ધરતી કારણરૂપ હતી. જી હાં, ફિલ્મ મધર ઈન્ડિયાના શૂટિંગમાં આગ લાગી અને સુનિલ દત્તે નરગીસને બચાવ્યા, બાદમાં બંનેએ લગ્ન કર્યા આ વાત બધ્ધે જ ચર્ચાયેલી છે. રસપ્રદ વાત એ છે કે આ ઘટના બની ત્યારે મહેબૂબ ખાનની આઈકોનિક ફિલ્મ મધર ઈન્ડિયાનું શૂટિંગ ગુજરાતના બિલીમોરામાં ચાલતુ હતું. ફિલ્મમાં આગ લાગવાનો સીન શૂટ કરવાનો હતો, અન ડિરેક્ટર મહેબૂબ ખાનના સમજાવવા છતાંય નરગીસજીએ બોડી ડબલ યુઝ કરવાની ના પાડી દીધી. પરંતુ શૂટિંગ સમયે પવનની દિશા બદલાઈ અને નરગીસજી આગમાં ફસાઈ ગયા. સુનિલ દત્તે પોતાના જીવની પરવા કર્યા વગર નરગીસને બચાવ્યા. જો કે આમાં સુનિલ દત્તે થોડી ઈજા થઈ. પોતાને બચાવનાર સુનિલ દત્તની નરગીસજીએ જાત્તે સેવા કરી. અને આ દરમિયાન બંને મિત્રો બન્યા. સાથી કલાકારો કરતા સવાઈ ઓળખાણ થઈ. 

નરગીસના ઘરની સામે બેસી રહેતા સુનિલ દત્ત  

સુનિલ દત્ત પોતાના કોલેજકાળમાં નરગીસના ઘરની સામે મરીન ડ્રાઈવની પાળી પર બેસી રહેતા. એક ઈન્ટરવ્યુમાં સુનિલ દત્તે સ્વીકાર્યુ હતુ કે નરગીસની બ્રિટિશ સ્પોર્ટ્સ કાર બિલ્ડીંગની બહાર નીકળે એ જોવા તે મિત્રો સાથે ખાસ બેસી રહેતા. અને વિધિના વિધાન તો જુઓ સુનિલ દત્તે નરગીસને પ્રપોઝ પણ કારમાં જ કર્યા હતા.  એક દિવસ સુનિલ દત્ત નરગીસને ઘરે મૂકવા ગયા, અને કહ્યું કે મને તું ગમે છે, મારે તારી સાથે લગ્ન કરવા છે. નરગીસ કંઈ કહ્યા વગર ઘરમાં જતા રહ્યા. સુનિલ દત્ત વિચારી રહ્યા કે આ શું કર્યું ? બીજા દિવસે શૂટિંગથી ઘરે આવ્યા તો એમની બહેન રાનીએ મુબારક બાદ આપી.. સુનિલ દત્ત ક્લૂ લેસ હતા. બહેન રાનીએ કહ્યું,’ઉન્હોને હાં કર દી હૈ. નરગીસજી આઈથી એન્ડ સી એગ્રીડ.’ જો કે મધર ઈન્ડિયા રિલીઝ થઈ ત્યાં સુધી બંને પોતાના સંબંધો જાહેર નહોતા કરી શખ્યા. કારણ કે ફિલ્મમાં સુનીલ દત્ત નરગીસના પુત્રના રોલમાં હતા. મહેબૂબ ખાનને બીક હતી કે આ વાત જાહેર થશે તો ફિલ્મ પિટાઈ જશે. આખરે 11 માર્ચ 1958ના રોજ બંનેએ આર્યસમાજમાં લગ્ન કરી લીધા.

       

 

તસવીર સૌજન્યઃ કોઈમોઈ.કોમ

ટિફિન પણ બનાવતા નરગીસ  

ફાતીમા અબ્દુલ રશીદ તરીકે જન્મેલા નરગીસ બાળપણથી જ ખાધે પીધે સુખી ઘરમાં ઉછર્યા હતા. તેમના માતા જદનબાઈ પણ ફિલ્મ ઈન્ડસ્ટ્રી સાથે સંકાળાયેલા હતા. જો કે, સુનિલ દત્તનું ઘ નાનુ હતું. લાઈફસ્ટાઈલ જુદી હતી. પણ નરગીસ એડજસ્ટ થયા. નરગીસ માટે સુનિલ દત્ત એમની બહેન સાથે કૂકિંગ કોમ્પિટિશન કરાવતા હતા. કોઈ પણ સામાન્ય ગૃહિણીની જેમ નરગીસ સુનિલ દત્ત માટે ટિફિન બનાવતા. કદાચ રાજ કપૂર સાથેના સંબંધોમાં જે ન મળ્યુ એ બધું જ મેળવી લેવાની, અને આ સંબંધો સદા જાળવી રાખવાની મહેનત હતી. નરગીસ અને રાજ કપૂરના સંબંધોની ચર્ચા ખૂબ હતી. પણ રાજ કપૂર ક્યારેય નરગીસને અપનાવી ન શક્યા. આ સંબંધોમાં કદાચ નરગીસને એકલાપણું ખૂબ લાગ્યુ હતુ. એટલે જ સુનીલ દત્ત સાથેના સંબંધોમાં એમણે ખૂબ જ ધ્યાન રાખ્યુ. લગ્ન બાદ પણ સંબંધોને રીતસર ઉછેર્યા.      

અને નરગીસ-સુનિલ દત્તની ફિલ્મી સ્ટાઈલથી શરૂ થયેલી લવ સ્ટોરી આખી જિંદગી ફિલ્મી સ્ટાઈલની જ રહી. નરગીસને પેન્ક્રિયાકટીક કેન્સરનું નિદાન થયું. એ સમયે સંજય દત્તની જિંદગી પણ ડામાડોળ હતી. ફિલ્મ સ્ટાર હોવા છતાંય સુનિલ દત્ત પાસે પૈસાની તંગી થઈ હતી. નમ્રતા દત્તે એક વાતચીતમાં કરેલા ઉલ્લેખ પ્રમાણે સુનિલ દત્ત નરગીસજીને ખવડાવતા, બ્રશ કરાવતા.. શક્ય એવી નાની મોટી બધી જ સેવા કરતા. અને નરગીસ પથારીવશ થવાથી એમના જીવનમાં પડેલી ખોટ મોટી હતી. કેટલીકવાર તેઓ એકલા ખૂણામાં રડી પણ રહેતા. જો કે કેન્સરને કારણે સુનિલ દત્તે 3 મે 1981ના રોજ નરગીસને ગુમાવી દીધા.